მაღაზიების დახლებზე  წარმოდგენილ, მრავალფეროვან საკვებ პროდუქტებს, განსაზღვრული ეტიკეტი აკრავს, რომელიც სინამდვილეში გაცილებით მეტი ინფორმაციის შემცველია, ვიდრე ერთი შეხედვით ჩანს. როდესაც ვსაუბრობთ საკვებში არსებულ მავნე ნივთიერებებზე, როგორც წესი, ერთ-ერთი, რაც გვახსენდება არის, ის საკვები დანამატები, რომლის დიდი რაოდენობით მოხვედრაც, საკვებ არეში, ტოქსიკურია ჯანმრთელობისთვის.

კონსერვანტები, რეალურად  დამცავი ნივთიერებებია, რომლებიც ხელს უშლის საკვებში მავნე ბაქტერიების გამრავლებას და პროდუქტის დაძველებას. მას კაცობრიობა უძველესი დროიდან იყენებდა, თუმცა  ბუნებრივი კონსერვანტების სახით. საკვები  კონსერვანტი უპირველეს ყოვლისა უსაფრთხო უნდა იყოს ადამიანისთვის. გარდა ამისა, არ უნდა შეცვალოს საკვების გასტრონომიული მახასიათებლები და არ შევიდეს ქიმიურ რეაქციებში შესაფუთ მასალასთან. ბუნებრივი და სინთეზური კონსერვანტების ეფექტი ადამიანის ჯანმრთელობაზე განსხვავებულია. ნატურალური წარმოშობის საკვებდანამატები უვნებელ დანამატებს წარმოადგენს, თუმცა ხელოვნურად მიღებული ნივთიერებების ჭარბად მოხვედრა სხვადასხვა დაავადების მაპროვოცირებელიც კი შესაძლოა აღმოჩნდეს.

ბუნებრივი, ცნობილია როგორც უსაფრთხო საკვები დანამატი, თუმცა გარკვეული დოზირებით. მაგრამ, მთავარი ყურადღება ექცევა, სახიფათო კონსერვანტებს, რომლებიც სინთეზური გზით მიიღება და  რომლებსაც აქვთ ორგანიზმში დაგროვების უნარი. მრავალი სინთეზური კონსერვანტი გავლენას ახდენს ჩვენი ორგანიზმის მიერ ვიტამინების შეწოვაზე, აუარესებს იმუნური სისტემის მდგომარეობას და ხელს უშლის ჟანგბადის სწორ მიმოქცევას უჯრედებში. სინთეზურ კონსერვანტებს მუტაგენური თვისებებიც კი აქვთ და შეუძლიათ განუკურნებელი დაავადებების გამოწვევა. ასევე აქვთ ტერატოგენული ეფექტიც.

ერთ-ერთი ყველაზე ფართოდ გავრცელებული კონსერვანტი, რომელიც  საკვები პროდუქტების ეტიკეტზე გვხვდება არის  - კალიუმის სორბატი (კლასიფიცირდება E202 ნიშნით). ის ჩვეულებრივ გამოიყენება სხვადასხვა საკვებ პროდუქტში ობის, საფუარის და გარკვეული ბაქტერიების ზრდის შესაჩერებლად.

კალიუმის სორბატი ზოგადად აღიარებულია, როგორც უსაფრთხო (GRAS), როდესაც მოიხმარება მცირე რაოდენობით. თუმცა, კალიუმის სორბატის ზედმეტად დიდი რაოდენობით მიღებამ შეიძლება გამოიწვიოს გარკვეული რისკები და გვერდითი მოვლენები. აქ მოცემულია რამდენიმე პოტენციური საფრთხე, რომელიც დაკავშირებულია კალიუმის სორბატის დიდი ოდენობით მოხმარებასთან.

ალერგიული რეაქციები: ზოგიერთი ადამიანი შეიძლება იყოს ჰიპერმგრძნობიარე ან ალერგიული კალიუმის სორბატის მიმართ. ალერგიული რეაქციები შეიძლება გამოვლინდეს ლორწოვანი გარსის და კანის  გაღიზიანების, გამონაყარის, ქავილის, შეშუპების, სუნთქვის გაძნელების ან კუჭ-ნაწლავის გაღიზიანების სახით.

კუჭ-ნაწლავის პრობლემები: დიდი რაოდენობით კალიუმის სორბატის მიღებამ შეიძლება გამოიწვიოს საჭმლის მომნელებელი სისტემის პრობლემები, როგორიცაა დიარეა, გულისრევა, მუცლის ტკივილი ან შებერილობა. ეს ეფექტები ძირითადად მსუბუქი და გარდამავალია, მაგრამ საჭმლის მომნელებელი სისტემის დარღვევების მქონე პირები შეიძლება უფრო მგრძნობიარე აღმოჩნდნენ ამ გამაღიზიანებლის მიმართ.

კალიუმის დისბალანსი: E 202, შეიცავს კალიუმს და მისი ჭარბი რაოდენობით მოხმარებამ შესაძლოა გამოიწვიოს ორგანიზმში კალიუმის დონის დისბალანსი. ეს შეიძლება გამოვლინდეს თირკმელების პრობლემების მქონე პირებისთვის ან მათთვის, ვინც ღებულობს მედიკამენტებს, რომლებიც გავლენას ახდენენ კალიუმის დონეზე.

ასევე არსებობს სამეცნიერო გამოკვლევები, კალიუმის სორბატის მუტაგენური და გენოტოქსიური ეფექტის შესახებ. აღმოჩნდა, რომ კალიუმის სორბატი იჟანგებოდა ასკორბინის მჟავასთან (C ვიტამინთან, რომელიც ბევრ საკვებშია) და რკინის მარილებთან შერევით. ამ ჟანგვითი რეაქციის პროდუქტებმა გამოიწვია მუტაგენურობა და დნმ-ის დამაზიანებელი მოქმედება.

კიდევ ერთ კვლევაში გაირკვა, რომ ეს ნივთიერება არის გენოტოქსიური ლიმფოციტებისთვის (სისხლის თეთრი უჯრედების).

მიუხედავად იმისა, რომ არსებობს სამეცნიერო გამოკვლევები კალიუმის სორბატის მუტაგენური და გენოტოქსიური ეფექტის შესახებ, მათი შედეგები ჯერ არ არის სრულად შესწავლილი.

საბოლოო ჯამში, შეიძლება ითქვას, რომ საკვებ პროდუქტებში გამოყენებული დანამატების მავნებლობას განსაზღვრავს მისი დოზირება. რეკომენდებული დოზით დამატებული ქიმიური კონსერვანტისგან ბევრად უფრო დაბალია, ჯანმრთელობის დაზიანების რისკი, ვიდრე მიკრობიოლოგიურად დაბინძურებული საკვების მიღების შედეგად. თუმცა, მაშინ როდესაც საკვები პროდუქტების მასწარმოების პირობებში, თითქმის ყველა შემთხვევაშია სხვადასხვა ტიპის კონსერვანტი გამოყენებული, რთულია აკონტროლო მისი მიღების დასაშვები დღიური დოზა. ამიტომ, ჩვენი რეკომენდაციაა თავი ავარიდოთ მსგავსად  წარმოებული პროდუქტის მიღებას, მაშინ მაინც, როცა ეს შესაძლებელია.